Duha na lang ka mga indibidwal ang nagpabiling positibo sa Delta variant dinhi sa Cagayan de Oro, ug anaa pa karon sa city isolation facility.
Kini ang gitaho ni Dr. Ted Yu, medical officer sa City Health Office, ngadto kang Mayor Oscar Moreno atol sa daily presser.
Kahinumduman nga miabot sa 82 ka mga kaso sa Delta variant ang na-detect dinhi sa Cagayan de Oro sukad niadtong Hulyo 15 ning tuig.
Sa siyam ka mga batches sa Delta variant cases dinhi sa syudad, adunay natumbok nga 229 ka mga close contacts sa nagpositibo sa mananakod nga virus, ug gilayon gidala sila sa isolation facilities sa syudad aron dili makapanakod sa ubang tawo.
Hinoon sa report ni Dr. Yu kagahapon, gibutyag sa maong opisyal ngadto sa mayor nga negatibo na sa RT-PCR test ang tanan 229 ka close contacts.
Tungod niini, nagpasalamat si Mayor Moreno sa maong kalamboan, sanglit gipasabot sa mayor nga ang paspas nga extraction, isolation ug testing importante kaayo diha sa pagpugong sa pagkaylap sa Delta variant dinhi sa syudad.
(Source: Cagayan de Oro City Philippines Facebook page)