Cebu city- Apektado na ang panginabuhi sa mga trabahante sa tourism industry sa pagminos sa mga turista nga nangabot sa Sugbo ilabi na sa dakbayan sa Lapulapu nga giilang “historic resort city” tungod sa hulga sa coronavirus disease kun Covid 19.
Kini ang giangkon sa pangu sa CDRRMO kun
City Disaster Risk Reduction Management Office sa Lapulapu, Nagiel Bañacia.
Sumala pa ni Bañacia, ang incident management team sa siyudad mitutok na sa pagtabang sa apektadong sector aron makapamawi sa pagtibugsok sa turismo.
Sa iyang bahin, si Annabeth Cuizon, acting chief sa City Social Welfare & Development Office (CSWDO), mitug-an nga nagpasiugda silag survey sa tanang barangay aron paghashas sa gidak-on sa kadaot nga nahatag sa kahadlok sa Covid 19 ngadto sa panginabuhi sa mga mulupyo.
Niadtong Lunes, Peb. 24, ang CSWDO nanghatag og dul-an sa usa ka gatos ka libo ka pesos nga kantidad sa pinutos nga mga pagkaon ngadto sa 221 ka tourism workers sa brgy. Punta Engaño kansang kinitaan apektado kaayo sa pagkunhod sa tourist arrivals.
Kini gilangkoban sa mga boatmen, babysitters, housekeepers ug niadtong nag-alagad sa aqua-sports activities.
Subay niini, matod ni Cuizon, nagpaabot pa silag laing barangay nga mangayog ayuda sanglit ang una nilang relief operations alang man lang sa Punta Engaño.