Estudyante sa usa ka inilang Catholic School diri sa Dipolog City ang nadakpan sulod mismo sa maong tulunghaan sa may alas 5 ang takna sa hapon sa nakalabayng adlaw, Pebrero 24, 2020.
Nagtingkagol na karon sulod sa presohan ang suspek nga itago nato sa pangalang “Dodoy”, 16 anyos ug lumulupyo sa Lopez Jaena Street, Barra sakop ning syudad.
Sumala pa sa inisyal nga imbestigasyon sa kapulisan, gipatawag ang ayaan sa suspek nga si Gilda Guido, 55 anyos, minyo ug residente sa nasangpit nga dapit sa guidance counselor sa maong tulunghaan tungod sa pagpunay ug absent sa suspek.
Nisaysay ang ginang nga sa mga nakalabay nga mga adlaw wala na niya masabti ang mga giakto niini. Aduna pay usa ka higayon nga nakit-an niya kining nanigarilyo ug daw drug adik sa iyang mga lihok nga gipakita. Didtong tungora, nagduda na siya nga aduna nay gibuhat nga illegal ang maong menor de edad. Tungod sa saysay sa ginang, giabrehan diha-diha dayon ang pack bag sa suspek ug didto nadiskubre ang mga layang dahon sa marijuana nga gisulod sa plastik nga sudlanan kauban ang usa ka lighter. Nitawag gilayon ug police assistance ang mga hingtungdan sa maong tulunghaan hinungdan sa pagka-aresto sa suspek.
Si alyas “Dodoy” nakalapas sa balaod nga RA 9165 kon Comprehensive Dangerous Drugs Act of 2002 nga maoy hinungdan nga anaa siya karon gibalhog sa Dipolog City Police Station aron sa pormal nga pagpasaka ug kaso batok kaniya.