Lauman pa ang pagtaas sa ihap sa COVID-19 cases sa Sarangani Province tungod sa nagpadayon karon nga “Risk-Based Targeted Testing” sa entiro probinsya.
Kini ang unod sa mensahe ni Governor Steve Chiongbian Solon human iyang gipirmahan ang Executive Order No. 16 nga nagbawal usa sa mga dili importanteng lakaw ug aktibidad hangtud Mayo 31 tungod sa maka-alarma nga pagdaghan sa nangaigo sa Coronavirus sa tibuok Rehiyon Dose.
Sa datus sa Department Health kagabii, as of May 10, nisutoy sa 189 ang aktibong kaso sa Sarangani. Nag-una ang South Cotabato nga 460 kabuok, gisundan sa dakbayan sa Heneral Santos 257, North Cotabato 224 ug 73 sa Sultan Kudarat.
Segun ni Governor Solon, sa tulo (3) ka semana nga ilang gitagana hangtud Mayo 31, matigayon ang agresibo nga Risk-Based Targeted Testing sa pito (7) ka munisipyo. Gani, nasugdan na kini niagi pang semana sa pagpaningkamot sa mga mayor ug sa diagnostic team sa probinsya ug sa mga kalungsuran sa pagpanguna sa opisina ni Provincial Health Officer Dr. Arvin Alejandro, ang pag-swab test sa tanang adunay sintomas, lakip na ang mga indibidwal nga gikan sa mga palengke, mga opisina sa gobyerno, mga kumpanya ug daghan pang ma-risgong lugar.
Matawag kini nga “general cleaning” sa tibuok Sarangani Province aron masiguro nga ma-isolate dayon ang mga nag-positibo, matambalan ug dili na makapanakod sa uban. Hinungdan nga wala usay makasulod ug gawas nga dili taga-Sarangani sulod sa maong tulo (3) ka semana, gawas na lamang kung essential ang katuyuan ug nakatuman sa mga personal safety protocol. Hinungdan usab nga gibawalan usa ang panagtapok sa mga tao ug dili importanteng kalihukan hangtud Mayo 31 gumikan anaa pa sa kritikal ang sitwasyon. (Provincial Information Office – Sarangani)
