Gitagbo ug tawag sa usa ka unidentified concerned citizen ang pagsulod sa Ber-Months ang mga personahi sa Dipolog City Fire Station mga ala-una singko sa kadlawon, Setyembre 1, 2020, nga gikatahong dunay usa ka panimalay ang nasunog.
Dali kining girespondehan sa Shift B sa Dipolog City Fire Station ning dakbayan diin nasayrang gilamuy na sa kalayo ang usa ka panimalay sa Lower Banicapt, Brgy. Galas ning Dakbayan sa Dipolog, nga gipanag-iyahan ni Florentina Buljatin, 83-anyos nga naa sa maong panimalay uban ang iyang PWD na anak.
Matud pa ni FO2 Gibson Manriquez, Fire Investigator, nga posibleng gasugod ang kalayo sa nabiyaan nga kandila sa altar diin nahimutang kini sa tindahan sa biktima, base usab sa pamaba sa mga saksi nga nagapangadyi ang biktima didto nga dapit diin sab didto nakita sa mga saksi gasugod ang kalayo.
Gisulayan pa kinig tabang sa mga kasilinganan ayha nakatawag sa mga bombero maong 85 porsyento na sa maong panimalay ang naugdaw lakip na ang sikbit niining tindahan ug lawak-paabangan, sa paghidangat sa kabomberohan.
Dali ra usab nga napalong sa mga nirespondeng personahi gikan sa BFP ang maong sunog ug gideklara kinig fireout ala-una singkwentay singko sa kadlawon, ug wa na kini nakatabok pa sa kasilinganang mga panimalay ug gambalay.
Gibana-banang mikabat sa sin-mil kapesos ang danyos sa maong sunog. Bisan paman niini, dakong pasalamat sa responding team nga way natalang samaran o nakabsan ug kinabuhi sa maong panghitabo bisan paman atol kini sa tunga sa kagabhion.
(Dipolog City Fire Station/ OIC Lyza Bautista, RPN DXKD Dipolog)