Cebu City – Gitugot na sa Land Transportation Franchising & Regulatory Board o LTFRB VII ang pagbalik sa biyahe sa tradisyonal nga PUJ o Public Utility Jeepney sa kalungsoran ug siyudad sa rehiyon gawas sa dakbayan sa Sugbo ug Mandaue.
Mao kini nasabotan sa miting sa regional IATF o Inter-Agency Task Force.
Sumala pa ni Direktor Eduardo Montealto, Jr., ang buhaton lang sa mga operator sa PUJ mao ang paglukat og special permits to operate ubos sa MGCQ basta naa kiniy balido nga CPC o Certificate of Public Convenience ug Registration.
Gawas niana, ipresentar usab sa operator ang yunit alang sa road worthiness inspection sa LTO o Land Transportation Office.
Kinahanglan usab nga adunay passenger insurance policy ang mga  operator ug taoran sa gitawag og impermeable plastic barriers ang dyip aron dili magkaduol o magkadikit ang mga pasahero ug drayber.
Sa maong paagi, kalikayan ang posibleng pagtakod sa coronavirus sa usag-usa kon pananglit naay pasahero o drayber nga masakiton.
Kinahanglan usab adunay distansiya nga usa ka metro ang matag pasahero.
Ang LTFRB VII nagsugod na pagpanawat og application sa special permit. (Jhon Tadlip/JTY)
(Source: LTFRB VII)