Cebu City – Malamposon ang operasyon sa pantog ni Cebu City Mayor Edgardo Labella gahapon sa buntag.
Mao kini gibutyag ni Atty. Rey Gealon, tigpamaba sa kagamhanan sa dakbayan, pipila ka oras gikan sa pag-opera sa mayor sa usa ka tambalanan.
Nagkanayon si Gealon nga milampos ang surgery ug ang mayor anaa na sa recovery room.
Una niini, gianunsyo ni Labella ang iyang pagpatangtang sa gall bladder stones.
Giangkon sa mayor nga ang pag-atubang sa coronavirus disease sa siyudad sulod sa lima ka buwan ang nakaingon sa iyang balatian.
Opisyal nga mi-leave si Labella kagahapon hangtod karon apan mobalik na siya sa trabaho sa Lunes, Sept. 7.
Pagka karon, maoy nagsilbi nga acting mayor si Bise Mayor Michael Rama.
Gitataw ni Gealon nga ang tanang serbisyo sa city hall magpadayon samtang wala pa ang mayor.
Nagkanayon si Gealon nga nagpasalamat sila sa mga nag-ampo sa kahimtang sa mayor ug miawhag nga ipadayon ang pag-ampo alang sa paspas nga kaayohan ni Mayor Labella. (Jhon Tadlip/ JTY)
(Source: Cebu City Public Information Office)
