Cebu City- Nasanta ni Mandaue City Mayor Jonas Cortes ang suway nga pagpalusot sa double dead nga mga karne sa baboy nga gikan sa Negros nga buot untang ibaligya og barato.
Naagian ug nasigpatan ni Cortes ang trak nga gikargahan sa walo ka patayng baboy nga mihunong sa brgy. Casili alas 7 pasado gahapon sa buntag.
Matod pa sa city veterinarian nga si  Dr. Karen Merilles, posibleng namatay ang mga baboy sa heat stroke o di ba sa ASF o African Swine Fever.
Nakita ni Merilles nga himsog ra ang mga baboy ug ang laing 122 ka buhing baboy nga kauban niini sa trak.
Nagtuo siya nga wa makaagwanta ang walo ka baboy sa kahuot sa ilang gisakyan ug kalayo sa biyahe hinungdang nangamatay.
Giangkon sa veterinarian nga si Cortes ang nagpahibawo kanila sa nahitabo dihang hiagian niini ang pagdiskarga sa walo ka patayng babaoy sa brgy. Casili.
Buot untang ibaligya og barato ang mga patayng baboy apan gipugngan sa mayor dayong tawag ni Dr. Merilles.
Alang ni Merilles, di angayng ibaligya ug isuwa ang namatay nga baboy sa wala matinong hinungdan  sa wa pa ihawa kay mao kiniy gitawag og “double dead” ug mahimong makadaot sa lawas sa tawong makalamoy. I via Jhon Tadlip/ JTY
