Cebu City- Gipaubos sa granular lockdown ang mokabat sa 356 ka panimalay ug establisimento sa dakbayan sa Sugbo sa milabayng adlaw.
Sumala pa sa deputy chief implementer sa EOC o Emergency Operations Center, Konsehal Joel Garganera, sukad ilibkas sa Regional IATF o Inter-Agency Task Force ang granular lockdown sa unom ka dapit sa siyudad niadtong Huwebes, wala nay compound o sityo nga gi-lockdown.
Matod pa ni Garganera, mao na karoy gihunahuna sa EOC ang pag-lockdown sa panimay o opisina o sa usa ka ang-ang sa bilding diin anaay kawani nga nagpositibo sa virus aron kapugngan ang pagpanakod.
Ug tungod kay daghan na mang establisimento ang gibuksan og balik, sumala pa ni  Garganera, mao na usab kini tutokan sa  EOC kay posible mang mahitabo ang pagpanakod sa mga dapit nga gitrabahoan.
Ang gigamit nga pamaagi sa EOC sa mga sityo mao usay ilang gamiton sa mga balay-patigayon.
Midugang ang konsehal nga 30 ka barangay ang wala nay community transmissions.
Sa pikas bahin, giawhag ni Garganera ang mga tigpatigayon nga dili magtago-tago ug estriktong ipatuman ang health protocols. (Jhon Tadlip/JTY)
(Source/s: Regional IATF/ Deputy Chief Implementer IATF Joel Garganera)