CAGAYAN DE ORO CITY- Gikonpirkar sa National Bureau of Investigation (NBI) ang daghang thermal scanners atol sa entrapment operation nga gihimo sa barangay Gusa ning syudad sa Cagayan de Oro. Kauban sa NBI sa maong operasyon ang Food and Drug Administration (FDA), Department of Trade and Industry (DTI), Regulatory Compliance Board (RCB), City Price Coordinating Council ug mga opisyal sa barangay.
Ang maong produkto gipanag-iyahan sa pamilyang Chiong sa maong dapit nga nailing usa ka medical supplier. Duolan sa duha ka milyon ka pesos ang kantidad sa maong mga thermal scanners diin ang orihinal nga presyo niini anaa lamang sa P300-P500 matag usa apan kini gibaligya sa nasangpit nga negosyante sa tag P9,500 matag usa.
Matud pa ni Atty. Patricio Bernales, regional director sa NBI nga sobra ra ka taas ang presyo sa pagbaligya niini. Gawas pa gibutyag nga wala usab kini insaktong papeles nga gikapakita.
Pasakaan sa kasong paglapas sa Consumer Act of the Philippines, Price Act, RA 9711 ug uban pang kalapasan batok sa supplier.