CAGAYAN DE ORO CITY- Ang pinakataas nga opisyal sa Police Regional Office (PRO) sa Northen Mindanao nagsugilon nga angayang i-improve ang tanang gipahimutang nga control points sa mga dapit sa Misamis Oriental ug Lanao del Norte aron mapugngan ang pagkuyanap sa coronavirus disease o covid-19. Kini tapos namatikdan ni Director Brigadier General Rolando Anduyan nga ang mga quarantine control points wala mapahimutang sa strategic areas, traffic signage wala mainsakto pagpahimutang ug walay insaktong gidaghanon.
Sa pagkakaron, ang Northern Mindanao adunay 57 ka QCPs nga gidumala sa mokabat 1,184 ka mga police personnel way labot niini ang gikan sa Bureau of Fire, Military, health workers ug uban pang force multipliers. Namatikdan ni Anduyan nga ang Iligan City ang adunay epektibo nga QCPs tungod kay aduna silay decontamination area alang sa entero katawhan sa syudad.
Mao nga tungod niini nga kahimtang, nagmando si Anduyan sa iyang mga sakop sa pagmugna sa labing maayong sistema ug procedure aron nga maayo ang dagan sa control points nga sa ingon ang kalihokan sa authorized persons magpabilin nga dili mabalda.