Susuportaran ni Mr. JC Siazon, Outstanding COVID-19 Volunteer for 2020 iti pagilian ti takder ni Gob. Matthew Marcos Manotoc a masapul nga ad-adu nga agtutubo ti maallukoy nga agessem iti panagtalon para iti pannakapaisigardu a maaddaan ti probinsia iti taraon kadagiti sumarsaruno a tawen.
Inbunannagna a daytoy ti rason a nangiyuswat ti gungloda ti naruay a proyekto iti Barangay Nalbo ditoy Siudad ti Laoag.
Imbatadna a malaksid iti organic ‘’gulayan sa barangay’’ ket mannarimaan payen ti pannakaipasdek dagiti pagtaraknanda ti baboy ken manok nga organic met laeng.
Segun kenkuana, adda pay ti maipaspasdek a pagpataundanda ti uong wenno mushroom culture.
Kunana a maipatpatungpal dagitoy a proyekto iti tulong ti gobernador ken ti sibubukel a gobierno probinsial.
Mainaig iti daytoy, impadanon ni Siazon ti napalaus a panagyamanna iti gobernador ken ti gobierno probinsial iti awan sarday a suporta nga ipapaay da kadagiti kakailian a pakairamanan dagit agtutubo. (Rodrigo Sadian, RPN DZRL Batac OIC)
(Source: Provincial Government of Ilocos Norte)