Seguro nang mapahamtangan og silot kadtong mga tawo nga magpataka lang pag-post sa social media ilabi na kabahin sa 2019 novel coronavirus.
Ang si bisan kinsang magpakatap og sayop nga impormasyon labot sa viral infection sa online o sa teks, mahimong masilotan og usa ka tuig nga pagkabilanggo ug pamultahon og hangtod sa P5 mil.
Ang naasoyng penalties nalatid sa ordinansa nga giaprobahan sa hunta probinsiyal gahapon sa hapon.
Sumala pa sa nag-sponsor sa ordinansahon, Bokal Kerrie Keane Shimura, ang pagpakatap og sayop nga kasayoran makamugna lang og katarantar sa publiko.
Busa atubangan sa mga tigbalita, si Shimura miingon nga kinahanglan nilang ipatuman ang penalties.
Si Shimura, nga maoy chairman sa Committee on Health & Social Services, ang nangamahan sa resolusyon.
Sa iyang bahin, si Atty. Russel Pernites, consultant ni Shimura, miingon nga ang bisan kinsa nga makasugat og “fake news” sa social media o sa text messages moduso lang og reklamo sa Provincial Legal Office (PLO).
Sanglit ang pagpakatap og sayop nga impormasyon labot sa 2019 nCoV kalapasan man sa ordinansa, ang PLO ang mo-facilitate sa pagsang-at sa reklamo atubangan sa provincial prosecutor.
Gisagop usab sa ordinansa ang protocols batok sa 2019-nCoV nga gihan-ay sa executive order no. 5 ug no. 5-A ni Gob. Gwendolyn Garcia.
photo: contributed