Cebu City- Upat ka sakop sa Police Regional Office kun PRO-7 ang nalakip sa 357 ka polis nga gipa-recall ni Gen. Archie Gamboa, ang labaw pangulo sa Philippine National Police (PNP).
Ang bag-ong director sa PRO 7, Brig. Gen. Albert Ignatius Ferro, mipahibawo sa mga reporter gahapon nga ang upat ka polis gimandoan sa pagreport sa Camp Crame nunot sa paglambigit kanila sa negosyo sa ginadiling droga.
Sumala pa ni Ferro, ang upat ka polis ipaubos sa gitawag og adjudication process aron paghatag og higayon niini pagpakita sa ilang kainosente sa pasangil.
Apan, matod ni ferro, kon mapamatud-an ang pasangil, mapapha sila sa serbisyo ug mag-atubang pa og laing kasong administratiba.
Hinoon, wala ibutyag ni Ferro ang ngan ug ranggo sa upat pero mipasalig nga hatagan kinig due process.
Ang pagpa-recall sa upat ka officers, sumala pa sa director, usa ka pasidaan sa ubang sakop sa PNP nga likayan gayod ang pagkalambigit sa illegal nga binuhatan.
Matod niya, niadtong director pa siya sa drug enforcement group sa National Capital Region Police Office (NCRPO), daan na siyang nakadawat og report bahin sa pagkalambigit sa ubang polis sa illegal activities.