Mainitong gidawat sa kagamhanang lokal sa Cagayan de Oro ubos sa administrasyon ni Mayor Rolando ‘Klarex’ Uy ang grupo ni Vice Mayor Nancy Socrates sa Puerto Princesa, Palawan nga nagpahigayon og benchmarking activity dinhi sa dakbayan, Marso 23 ning tuig.
Gibutyag ni VM Socrates nga tumong sa ilang benchmarking nga masayran ang ‘best practices’ sa Cagayan de Oro sa pagpadagan sa motorela.
Lakip sa gidayeg sa bise mayor ang paghimo sa syudad og departamento sa Roads and Traffic Administration kon RTA.
Nakadayeg usab si VM Socrates sa syudad nga adunay kaugalingon nga LGU-run hospital nga mao ang JR Borja General Hospital nga naghatag og batakang serbisyo sa panglawas sa katawhan.
Sa iyang kabahin, gipadayag usab ni City Mayor’s Office Chief of Staff Shiela B. Lumbatan ang mensahe ni Mayor Klarex sa pagpasalamat sa grupo ni VM Socrates sa pagbisita sa dakbayan.
Nalakbitan usab niini ang tinguha sa duha ka mga syudad ang Cagayan de Oro ug Puerto Princesa nga buhion pagbalik ang pormal nga pagbugkos isip sister cities alang sa mas lapad pa nga partnerships sa natad sa turismo, investments ug uban pa.
(Source: CIO-CDO, photo courtesy by Reynan Baylin)