Cebu City – Makabaton na unya og kaugalingong OSS o One-Stop-Shop alang sa crew change ang pantalan sa Sugbo.
Suma pa sa general manager sa CPA o Cebu Port Authority, Leonilo Miole, ang OSS crew change maisip nga ikaupat sa nasod kon ma-activate na, sunod sa Port of Manila, Port of Capinpin sa Bataan, ug sa Subic Bay Freeport Zone.
Segun sa advisory sa CPA, ang presensiya sa crew change hubs magtugot sa mga operator sa maritime vessels pag-rotate sa ilang mga tripolante base sa provisions sa International Labor Organization (ILO) nga nag-ingon nga ang mga seafarers moalagad sa barko sulod sa 11 ka buwan nga way bakasyonay.
Base sa pamahayag ni Miole, ang advisory miingon nga ang naasoyng inisyatiba tubag usab sa kabana bahin sa epekto sa COVID-19 pandemic diin gipatuman ang port restrictions ug ang mga  shipping firms mihulip sa mga tripolante ug ang ubang kontrata gilugwayan.
Midugang si Miole nga ilang giabiabi ang maong kaugmaran sanglit ang  activation sa one-stop-shop crew change hubs makapadali man sa dis-og sa pagbalhin sa matanggong-sa-barko nga mga seafarers ug sa samang higayon, makakuha usab og revenue ang CPA tungod sa port charges sa pagdunggo ug pagpundo sa barko. (Jhon Tadlip,  photo courtesy of Cebu Port Authority)
(Source: Cebu Port Authority)