Tungod sa taas nga ihap sa COVID cases sa syudad, gipahibalo sa Northern Mindanao Medical Center (NMMC) nga adunay pag ‘slow down’ sa ilang ubang serbisyo aron pagpalig-on ug dugang serbisyo sa mga nataptan sa COVID 19 nga anaa sa ilang tambalanan.
Matud ni Dr. Bernard Julius Rocha, Liaison officer sa NMMC, nga anaa na sa 104 ka mga pasyente ang kasamtangang na-admit sa EREID enclosures ug kini ang pinakataas nga ihap sugod sa nilabay’ng tuig.
“NMMC operations will be slowing down to increase our response to COVID 19 patients,” saysay ni Dr. Rocha. Gipasabot ni Dr. Rocha nga anaa gihapon ang mga elective surgeries, OPD ug ubang serbisyo apan limitado lamang kini. Kahinumdoman nga ang NMMC maoy COVID referral hospital sa rehiyon ug lakip sa mga na-admit mga molupyo sa nagkalain-laing probinsya.
Gidugang ni Dr. Rocha nga mahimo gihapong motawag ug mo-avail sa ilang telekonsulta numbers aron mas mapasayon ug dili na kinahanglan pa moadto sa hospital.
(ACM, photo courtesy by Nicasio Anches | City Information Office)
