Nasikop sa mga operatiba sa Dipolog City Police Station ang usa ka giingong bag-ong Street Level Individual (SLI) atol sa buy-bust operation nga gihimo sa Purok 3, Barangay Sta. Isabel, Dipolog City niadtong Mayo 26, 2026.
Giila ang dinakpan sa alyas nga “Drian” 25 anyos, minyo ug residente sa maong barangay. Nahitabo ang operasyon mga alas 6:20 sa gabii pinaagi sa Dipolog CPS-Station Drug Enforcement Team ubos sa pagpanguna ni Police Captain Daryl Samonte ug sa direktang pagdumala ni Police Lieutenant Colonel Khisna Bagis Asaali.
Narekober gikan sa suspetsado ang unom ka sachet nga adunay gituohang shabu, lakip ang sachet nga gigamit isip buy-bust item. Nakuha usab sa mga operatiba ang P500 buy-bust money, itom nga pitaka, lighter, kahon sa posporo ug pipila ka sinsilyo.
Sumala sa kapulisan, mokabat sa tulo ka gramo ang gibug-aton sa nakumpiskang ilegal nga droga nga adunay gibanabanang kantidad nga P20,400. Ang mga ebidensya itugyan sa Zamboanga del Norte Provincial Forensic Unit alang sa eksaminasyon samtang ang suspetsado nagpabilin sa kustodiya sa Dipolog CPS ug giandam na ang kasong ipasaka batok kaniya.(IKEN B. GULLEM)
Source: RoNey PaCilan Tv