Subay sa celebrasyon sa farmers ug fisherfolk month, unom ka benepisyaryo sa insurance program sa Philippine Crop Insurance Corporation (PCIC) nakadawat human makaagom og kadaot sa ilang panginabuhian, diin pormal silang gidunolan og insurance indemnity checks sa City Government of Dapitan pinaagi sa City Agriculture Office niadtong milabay nga adlaw.
Ang maong ayuda nga mikabat sa ₱69,062.00 gitumong alang sa duha ka mangingisda ug upat ka coconut farmers aron makatabang sa ilang pagbangon gikan sa pagkawala ug kadaot nga nakaapekto sa ilang pagpangisda ug pagpanguma tungod sa wala damhang mga hitabo.
Dungan sa turnover, gipasalamatan sa mga opisyal sa dakbayan ang padayong pakigtambayayong sa PCIC sa pagpanalipod sa sektor sa agrikultura ug pangisda. Mitambong sa kalihokan sila ni PCIC representative Mr. Willard Abao, City Agriculturist Mr. Cyril A. Patangan, ug City Administrator Mr. Danilo S. Areños Jr.
Gipahinumdoman usab sa City Agriculture Office ang mga mag-uuma ug mangingisda sa kahinungdanon sa pagparehistro ug pagpa-insure sa ilang panginabuhian aron adunay madangpan nga suporta pinansyal panahon sa kalamidad ug uban pang dili malikayang sitwasyon. Dugang pa, matag benepisyaryo nakadawat usab og 10 ka kilo nga bugas gikan sa City Government of Dapitan ubos sa liderato ni Mayor Evelyn T. Uy.(IKEN B. GULLEM)
Source: Dapitan City Agriculture Office