Cebu City — Mokabat ug dul-an sa tunga sa milyon ka pesos ang nadala sa pito ka armadong tulisan gikan sa biktima nga negosyante ug isda ug nokos sa Sitio Kabay-ot, Barangay Hilantagaan, Sta. Fe, Cebu, pasado alas 10 kagabii, Mayo 6, 2021.
Gibutyag sa otoridad nga ang pito ka mga wala mailhing responsable, mi abot sa Isla sa Hilantagaan sakay sa duha ka pumpboat, ug mitulis sa P465,000 nga cash gikan sa pamilya.
Lakip nga nadala ang upat ka cellphones, CCTV box recorder ug usa ka CPU.
Matod ni Police Senior Master Sergeant Henrey Asentista sa Sta. Fe Police Station, nga usa ka sakop sa pamilya nga giilang si Danny Boy Carabio, na samdan, human ma igo ang iyang ulo sa rifle.
Samtang ang iyang asawa gigapos atol sa tulis, ang ilang mga anak gi lock sud sa kwarto sa ilang balay.
Ang insidente nahitabo atol sa brownout sa isla sa Hilantagaan, dool sa Isla sa Bantayan, hinungdan nga maglisod pag-ila ang mga biktima ngadto sa mga nanulis.
Suma pa ni Asentista nga tua sa nahisgutang isla ang mga investigators aron sa pag imbestiga sa hitabo.
(Jhon Tadlip/JTY)
(Source: Santa Fe Police Station, photo courtesy by Shang T. Dee)