Naipaayan iti gift certificate ken MINC cards dagiti Jeepney Drivers and Operators ditoy Ilocos Norte tapno magundwayanda dagiti diskuento no gumatangda ti agas kadagiti nagduduma a drug stores ditoy Ilocos Norte.
Napanunutan daytoy ni Gobernador Matthew J. Marcos Manotoc kabayatan iti pannakitaripnong na pakairamanan ni Mr. Perry Martinez iti Metro Ilocos Norte Council kadagiti nasao a grupo itay kallabes.
Dagiti maited a gift certificate ken MINC cards kadagiti Jeepney Drivers and Operators ket kas tulong pay laeng ti gobierno probinsial kadakuada nangruna ita a panawen ti pandemia.
Bigbigen ti gobernador iti ar-aramiden a sakripisio ken tulong dagiti drivers ken operators a mangipapaay ti serbisio kadagiti 25 a ruta iti intero nga Ilocos Norte.
Indanon met ti gobernador iti panagyaman na kadagitoy gapu iti panangikarkarigatanda a makarekobre ken agbiag iti babaen ti new normal.
Innayon iti ama ti probinsia a dagitoy dagiti sektor ti kagimongan a maysa pay kadagiti nakaro a naapektaran iti pandemia gapu ta bimmassit ti mailugan da a pasahero malaksid a dagiti dadduma ket saanda pay a makaruar nga agpasada. (Rosita Macalipis, RPN DZRL Batac Correspondent)
(Source: Provincial Government of Ilocos Norte)