Zamboanga del Sur – Di muobos sa 50 mil ka pesos ang natangag sa mga kawatan human gitulis ang duha ka negosyante sa Dumalinao, Zamboanga del Sur niadtong Hulyo 17 2021, alas 11:00 sa gabie.
Ang mga biktima usa ka Dexter Carreon, lalaki, 36 anyos, minyo, negosyante ug lumulopyo sa Purok Badian, Brgy. paglaum Dumalinao ug asawa niini nga si Joan Carreon. Gikatahong pagpanirado sa ilang negosyo nianang gabhiona, padulong na kini manguli sa ilang pinuy-anan sakay sa ilang single motor dihang pag-abot sa National highway, Brgy. Pag-asa Dumalinao, kalit lamang silang gidul-itan ug riding in tandem sakay sa XRM125 single motor, nakasuot ug gray sweatshirt ug kalit lamang silang gitiunan ug daw 45 kalibre nga pusil. Midiklara ang mga suspek ug tulis dayong ingon “Ayaw mog lihok, kwarta ra among tuyo”.
Natangag gayud sa mga tulisan ang mukabat sab sa dise nuebe mil ka pesos (₱ 19,000) nga halin sa pagpamaligya ug barbecue ug mga alahas nga gituohang mubalor usab sa saisentay singko mil ka pesos (65,000 php) ug mga ID niini.
Dali gilayong misibat ang mga suspetsado padulong sa lungsod sa Guipos. Ning kasamtangan, padayon gihapon ang pagpangita sa mga suspek kinsa hangtud ning taknaa, wala pa mailhi.
(Diocsil Sanico, RPN DXKP Pagadian OIC)
(Source: Public Information Office – Police Regional Office IX)