Cebu City – Giandam na sa National Bureau of Investigation Central Visayas (NBI 7) ang pipila ka mga kaso batok sa duha ka lalake nga nasikop gumikan sa pagbaligya ug peke nga swab test result, sagad ngadto sa mga mibyahe padung sa Bohol.
Matod ni NBI 7 Regional Director Renan Oliva nga isang-at nila ang kasong estafa thru falsification of public document ug kalapasan sa Cybercrime Prevention Act of 2012 batok sa mga suspek nga sila si Rogelio Sumalinog Nebres ug Sultan Busara.
Gibutyag ni Oliva nga gipa ubos na sa inquest proceeding kagahapon, Biyernes ang duha.
Si Nebres ug si Busara giingong mi produce sa mga dokumento nga dunay negative nga RT-PCR ( reverse transcription polymerate chain reaction) gamit ang standard laboratory form sa Vicente Sotto Memorial Medical Center (VSMMC) subnational molecular laboratory.
Sa iyang bahin, si VSMMC Chief Gerardo Aquino Jr. na alarma labot sa illegal activity sa pagkasayod nga ang peke nga dokumento nagdala sa logo sa hospital.
” We would like to state that we do not condone such activities. We are dismayed by these unscrupulous acts conducted by these individuals, which (have) tarnished the hard-earned reputation of VSMMC’s subnational laboratory, mensahi ni Aquino.
Nagkanayon si Aquino nga mohimo sila ug legal action batok sa mga suspek ug nakigcoordinate sila sa NBI-7 alang sa pagsang-at ug tukmang kaso.
Awhag ni Aquino sa publiko nga magmabinantayon ug mopa ubos sa RT-PCR test ngadto lang sa accredited nga mga laboratories.
Dugang awhag niya sa publiko nga i report ang nahisgutang illegal nga mga buhat.
“We need the public’s cooperation and vigilance so that no individual can take advantage of this pandemic to carry out their illegal motives,” mensahi ni Aquino.
Suma pa ni Oliva nga nasikop si Nebres sa Pier 1 samtang si Busara didto madakpi sa iyang shop sa Dan Colon, Syudad sa Sugbo.
Iyang gibutyag nga ang duha ka suspetsado mo edit sa standard laboratory test result form sa VSMMC aron ibutang ang pangan sa ilang kliyente nga negatibo ang resulta sa kantidad nga ₱ 1,500 o katunga lang sa P3,000 nga maoy minimum nga presyo sa accredited nga pribadong laboratory.
Makuha dayon ang resulta sa peke nga dokumento dili abtan ug usa ka oras ,samtang sagad sa mga laboratoryo mo-abot kini ug 24 ngadto sa 48 oras.
Nasuta sa NBI nga sagad sa mga mikuha sa peke nga mga test results mga mibyahe sa Lungsod sa Tubigon ug Syudad sa Tagbilaran, Lalawigan sa Bohol. (Jhon Tadlip/JTY)
(News & photo courtesy of National Bureau of Investigation 7)
