Sugod na sa pag-epekto ang Moratorium o temporaryong paghunong sa pagpangdawat sa mga Locally Stranded Individuals (LSIs) pasulod dinhi sa dakbayan sugod kaniadtong Oktubre 15, 2020.
Kining maong kamandoan ang nahimugso human na-uyonan sa Regional Inter-Agency Task Force (RIATF) IX pinaagi sa Chairperson niini nga si DILG Regional Director, Paisal O. Abutazil ug Regional Task Force IX, Chairperson pinaagi usab ni Office of the Civil Defense Regional Director, Manuel Luis M. Ochotorena, pinaagi sa Joint Resolution No. 5 series of 2020 pinetsahan ug Oktubre 13, ning tuiga.
Sigun sa dugang nasayran, nga kining maong lakang sa RIATF maoy pagsanong ngadto sa sulat hangyo sa kagamhanang lokal ning dakbayan pinaagi sa usa ka resolusyon gikan sa Sangguniang Panlungsod nga naghangyo alang sa Moratorium o Temporaryong pagsuspinde o paghunong sa pagpangdawat sa tanang mga Locally Stranded Individuals (LSIs) nga mopauli dinhi sa atong dakbayan, diin gipalig-on pinaagi sa letter G sa nasangpit nga Joint Resolution No. 5.
Sumala pa sa City IATF, nga aron kahatagan sa igo ug hugot nga pagtutok ang paghimo sa “contact tracing” dinhi sa siyudad ug lalawigan, mas maayo nga temporaryo ona nga ihunong ang pagpangdawat sa mga mamauli nga mga Locally Stranded Individuals (LSIs) dinhi sa atong dakbayan, nunot sa nagka-daghan na karon nga kaso sa community transmission sa COVID 19 dinhi sa atong dakbayan ug lalawigan.
Nasayran gikan sa nasangpit nga Joint Resolution No. 5 sa Regional Inter-Agency Task Force, nga kauban sa atong dakbayan nga mihangyo og moratorium ngadto kanila mao ang kagamhanang Probinsiyal sa Zamboanga Del Sur ug Lungsod sa Dumalinao, sa nahisgotang lalawigan.
Lakip sa mga nauyonan sa RIATF ug RTF nga nahalagda usab sa susamang Joint Resolution No. 5, mao ang pagmando sa tanang mga kagamhanang lokal alang sa hinanaling pagpahigayon og mga Contact Tracing Operations pinaagi sa pagkolekta og mga swab samples gikan sa mga indibidwal nga gituohang adunay COVID 19, uban sa hugot nga pag-isolate nini;
pagmando sa Philippine National Police sa pagpakig-koordinar ngadto sa ubang mga otoridad alang sa hugot nga pagpatuman sa mga gabay kabahin sa COVID 19 ug uban pa.
Kahibalo-an nga ang Regional Inter Agency Task Force mao ang nagtutok dinha sa pagmugna ug mga palisiya, samtang ang Regional Task Force mao ang magtutok usab sa kabahin na sa operasyon o pagpatuman niini.
(City Information Office – afb, photo courtesy by Dipolog City Government Facebook page)