Iriga City — Modular learning man giraray an Sistema nin paktukdo sa pam-publikong eskuwelahan an gagamiton ngunian na aldaw sa pagbubukas nin klase.
Iyo ini an sinabi ni Dep-Ed Schools Division Superintendent, Dr. Cecille Bernadette Rivera, matapos na maka-olay kan Radyo Ronda.
An siring na Sistema iyo an nagluwas sa saindang ginibong survey sa pagpapalista pa sana kan mga magurang O panahon kan enrollment kun ano an saindang gustong Sistema nin pagtukdo.
Alagad igua man giraray nin magkapirang eskuwelahan na gagamitan nin blended learning orog na an ibang eskuwelahan na maray an access sa internet asin mga gadget, alagad sasalakan man giraray nin modular nganing mas makanood an mga estudyantes.
Sa balyong lado, siniguro man ni Regional Director Dr. Gilbert Sadsad kan Dep-ed na mayo sindang nahihiling na problema sa pagbubukas kan klase ngunian na aldaw asin kun igua man ini mga isolated sana asin dai dapat ikonsiderar na ulang sa paglaog sa eskuwela kan mga kaakian.
Alagad, nangapudan pa man an opisyal sa gabos na sector kan komunidad na tabangan an Dep-ed sa pagbubukas nin klase huli ta an edukasyon bako sanang concern kan sarong sector kundi kan gabos na sector kan komunidad. (OIC Melvin Barayoga, RPN DZKI Iriga)
(Source: Interview with Dr. Cecille Bernadette Rivera, Dep-Ed Schools Division Superintendent)
