Cagayan de Oro City – Sugod karong adlawa, Oktubre 5, ipatuman sa syudad sa Cagayan de Oro ang pagmulta balor dos mil pesos sa kinsa mang masapon nga dili magsul-ob sa face mask ug face shield apil na ang mosupak sa social distancing. Kini subay sa Ordinansa Numero 13946-2020 nga gipalabang sa konseho ning dakbayan.
Sa tinguha nga way mamultahan, ang Community Development Volunteers (CDVs) nang-apod apod sa mga face masks ug face shield sa kabaranggayan. Matud pa sa CDVs, wala na gyoy rason nga mamultahan pa tungod kay kay ikapalit. Ang mga washable face masks gitunol sa dakbayan pinaagi sa City Health Insurance Office (CHIO) ubos ni Dr. William Bernardo aron maaporan gayod ang matag barangay.
Samtang sa pikas bahin, gihangyo sa Disiplina Muna Advocacy Team sa syudad ang mga CDVs isip usa sa mga partners nga ipahibalo sa katawhan ang maong pagpatuman sa multa sugod karong adlawa Oktubre 5 apil na sa makasupak sa pagpatuman sa social distancing.
Maoy tumong sa nahisgutang lakang ang pagpakgang sa pagkuyanap sa COVID-19 dinhi sa syudad sa Cagayan de Oro. (City Information Office)