Pito ang nag-uyon asin Lima ang nag-kontra, ini ang naging resulta kang botohan sa plenaryo kang Sangguniang Panlalawigan kan Camarines Sur matapos ang nasa sarung oras may kabanga (1 1/2 hours) na deliberasyon manungod sa pagbakal kan Kapitolyo Provincial ning 33 mga luxury cars.
Ang mga board member na sinda Nelson Julia, Awel Llaguno, JJ Pilapil, Rupert Alfelor asin Trixie Clemente Maquiling pararehas ang pahayag asin kahaputan na kung sain asin ano ang pagagamitan kang nasambit nang mga vehikulo, lalo pa ngunyan na pahahon nin pandemya na dapat mas ini ang tawan nin atensyon.
Base kaya suboot sa kapitolyo, ang mga vehikulo na ini gagamiton sa mga various programs and projects kang Kapitolyo Provincial asin pagresponde sa paglaban sa CoVid 19 lalo na ta may mga hinahakot suboot sa border control checkpoint sa Del Gallego nin mga LSI na kaipuhan i-isolate sa Quarantine Facility kang provincia asin kung may mga kalamidad magagamit sa pag-responde.
Alagad sabi kan nasambit nang mga bokal, ang luxury cars dai man nauuyon sa pag-responde sa kalamidad ta kung may mga baha dai man makaka-agi sa baha asin kung panghakot man kang mga Locally Stranded Individuals o LSI, labi naman kadakol ang 33 na vehikulo.
Tinawan duon kan minority block kang Sangguniang Panlalawigan na mayu maraot kung magbakal alagad dai man paka-sobra nin huli ta mas dapat nganing tawan atensyon ang pandemyang namamatian kan satuyang nasyon.
Nasa ₱ 46M ang pundo na nakatagama sa pagbakal kan mga nasambit nang vehikulo na parte kang inutang sa bangko.
(Source: Provincial Office of Camarines Sur, photo courtesy of Bicol Politics, News & Updates Facebook page)