Cebu City – Gikompirma ni Cebu City Administrator Floro Casas Jr. nga na discharge na sa hospital si Mayor Edgar Labella, Miyerkules sa gabii, Agosto 6, 2021.
Matod ni Casas nga ila pang i discuss kung kanus-a mosugod ug trabaho si Labella.
“Sabutan pa na when siya balik work, but I think very soon,” mensahi ni Casas.
Matod pa nga nag depende lang sa iyang doktor labi na nga nagsaka ang kaso sa Covid-19.
Kahinumduman, na admit si Labella sa pribadong tambalanan sa syudad kapin sa duha ka semana gumikan sa pnuemonia.
Gani, dunay mga istorya nga mikatap nga nag-ingong mitaliwan ang mayor.
Ang maong taho nahunong sa miaging Sabado, dihang mipagawas ug hulagway si Labella nga dunay kopya sa Freeman ug Philippine Star, pinitsahan ug Hulyo 31, 2021, duna say Banat News sa iyang loyo.
Nagsilbi kini nga una niyang public appearance sukad sa iyang medical leave nga nag sugod niadtong Hulyo 14.
“Maayong buntag! I would like to inform everyone na I’m alive and doing well. Kini tungod sa tanan mga nag ampo ug nagpadayag sa ilang pagsuporta.
Daghan kaayong salamat ug mag amping kitang tanan,” gibutang nga caption sa nahisgutang hulagway.
Niadtong Enero, mipa ubos si Labella ug tulo ka adlaw nga medical leave gumikan sa ear infection ug nilahos sa work from home arrangement kapin sa usa ka buwan.
Nibalik kini sa City Hall buwan sa Marso.
Pagka Mayo 31, nag medical na sab ug tulo ka adlaw ang mayor, human kini ma admit sa tambalanan gumikan sa “slight pneumonia”.
Niadtong Hunyo 9, mi file na sab kini ug tulo ka semana nga medical leave aron sa pagpa alim,ug iyang gibutyag nga gawas sa iyang ear infection,duna sab kini sepsis o blood infection.
Sa ika-upat nga higayon nag medical leave si Labella Hulyo 14-16 gumikan sa way hunong nga pag-ubo.
Na extend ang iyang leave, hinungdan sa pag lingkod nila ni Vice Mayor Rama ug Councilor Donaldo Hontiveros nga Acting Mayor ug Acting Vice Mayor. (Jhon Tadlip)
(News & photo courtesy of Cebu City Public Information Office)