Cebu City -Temporaryong giserhan ang buhatan sa kapolisan sa Minglanilla, Cebu tungod sa pagpositibo sa coronavirus disease sa ilang hepe sa miaging adlaw.
Si Col. Alladin Collado, director sa CPPO o Cebu Police Provincial Office, miingon nga magpabiling serado ang station hangtod nga di pa mogawas ang resulta sa swab test sa 30 ka polis.
Gipaubos sa test ang mga polis kagahapon ug ang resulta mogawas paglabay sa tulo ka adlaw.
Hinuon, gitataw ni Collado nga magpadayon ang serbisyo ug operation sa police station.
Iyang gitug-an nga nagmontar lang silag tolda gawas sa buhatan isip temporary station.
Midugang si Collado nga napu ka sakop sa CPPO ang gipada sa Minglanilla isip augmentation team samtang gi-isolate pa ang ubang polis salungsod.
Matod ni Collado, gi-disinfect na hinuon ang station samtang ang hepe gibutang sa isolation facility sa lungsod.
Samtang mga personnel nga gi-isolate sa ilang buhatan miingon nga wala silay namatikdang timailhan sa sakit.
Ang Minglanilla adunay gilay-ong 15 ka kilometro habagatang bahin sa Cebu City.
(Jhon Tadlip/JTY, photo courtesy by Minglanilla Police Station)
(Source: Cebu Police Provincial Office)