Cebu City – Nagpasidaan ang EOC o Emergency Operations Center nga kon magpadayon pagsaka ang ihap sa mga masakit sa coronavirus disease o COVID-19 mahimong ipaubos og balik sa lockdown ang dakbayan sa Sugbo .
Nasayran nga hangtod niadtong Miyerkules, Nob. 11, nakatala ang siyudadog 28 ka bag-ong kaso hinungdang miabot na og 131 ang tanang aktibo.
Alang ni Konsehal Joel Garganera, deputy chief implementer sa local IATF ug pangu sa EOC, makapaalarma na ang maong gidaghanon.
Nagkanayon si Garganera nga magsilbi kining pasidaan sa gobyerno, sa PNP, ug barangay.
Midugang ang konsehal nga kinahanglang maningkamot ang mga front-liners ug magtinabangay ang tanan.
Matod niya, nakasinati man gani ang ubang dagkong nasod sa second wave sa pagkatap sa virus unsa na kaha ang Pilipinas o ang siyudad sa Sugbo?
Subay niini, giawhag sa EOC ang mga establisimento nga motuman lang gyod sa health protocols ug ang mga mulupyo sa pagmaigmat sa ilang pagpanggawas ug pag-adto sa mga dapit publiko.
Pagkakaron, 80 porsyento sa pagpanakod nag gikan sa gawas sa balay ug 20 porsyento lang sa sulod. (Jhon Tadlip/JTY, photo courtesy by Joel Garganera)
(Source: Cebu City Emergency Operations Center (EOC))
