Cebu City – Gidesisyonan sa Cebu City Emergency Operations Center (EOC) nga gidili una ang pagpahigayon og “Operation Tuli” sa siyudad.
Si Konsehal Joel Garganera, pangu sa EOC, miingon nga lisod ang pagsubay sa health protocols panahon sa pagtuli.
Matod ni Garganera, sagad sa mga bata mohilak ug mosiyagit atol sa proseso busa mangalagpot gyod ang laway sa palibot.
Base sa mga pagtuon, kon ang tawo mosinggit, mamisik ang droplets hangtod sa unom ka tiil o lapas pa.
Midugang siya nga lisod usab alang sa mohimo sa pagtuli nga magsul-ob og full personal protective equipment (PPE).
Giluwatan ni Garganera ang maong statement nunot sa request nga iyang nadawat gikan sa lainlaing grupo nga buot magpasiugda og Operation Tuli.
Subling gipadayag sa konsehal nga dili pa kini mahimo pagkakaron, basin sa umaabot. (Jhon Tadlip/JTY)
(Source: Emergency Operations Center-Cebu City)