Cebu City – Nagplano ang kagamhanang probinsiyal pagpahamtang og silot sa mga makalapas sa guidelines sa kalihokang pangturismo sa Sugbo subay sa tinguhang pagpatuman sa protocols ubos sa new normal.
Atol sa regular session sa hunta probinsiyal gahapon, giaprobahan sa unang pagbasa ang ordinansahon nga nagsagop sa Executive Order no. 20-A ni Gob. Gwendolyn Garcia nga naglatid sa guidelines sa operation sa mga esablisimento sa turismo sa lalawigan.
Si Bokal Andre Duterte, nga tsirman sa  Committee on Tourism, miingon nga ang estriktong pagpatuman sa mga polisiya gikinahanglan para pagseguro sa kaluwasan sa mga kawani ug bisita sa tourist destination.
Matod pa ni Duterte, bisan walay nakit-ang kalapasan ang  Provincial Tourism Task Force sa mga establisimento nga gitugtan nang magbukas pero naay uban nga nangabi bisag walay permit gikan sa Kapitolyo.
Ubos sa ordinansahon, kadtong masakpang makalapas pahamtangan og multa nga ₱ 5,000 o pagkabilanggo og hangtod sa usa ka tuig o sa duha agad sa desisyon sa korte.
Nalatid usab sa ordinansahon nga ang mga sakop sa local tourist police unit, Philippine Coast Guard, ug Bantay Dagat ang in-charge sa paghatag og seguridad sa tourism activities ug sa pagpatuman sa minimum health standards. (Jhon Tadlip/JTY)
(Source: Cebu Provincial Government)