Cebu City – Nakadakop na usab ang mga sakop sa Bureau of Customs- Port of Cebu o Customs-Cebu og laing kargamento sa pinalusot nga sigarilyo gikan sa China.
Sa usa ka statement nga giluwatan gahapon, ang Customs Cebu miingon nga ang smuggled cigarettes nahiabot sa Sugbo sa duha ka shipments nga gi-consign sa GRR Trading.
Ang naasoyng mga sigarilyo gibanabanang mobalor og ₱ 92 milyones.
Basi sa statement, si acting district collector Charlito Martin Mendoza miingon nga nasakpan nila ang illegal nga kargamento tungod sa hugot nga pagbantay sa mga sakop uban sa modernong x-ray inspection technology.
Ang statement nag-ingon usab nga ang mga kargamento gideklarar nga mga payong, lamesa, cabinet ug mga lingkoranan.
Apan dihang gipaubos sa x-ray inspection nunot sa request sa  ESS o  Enforcement and Security Service sama niadtong una, nasuta nga aduna kiniy sud nga mga binaston nga sigarilyo.
Kon mahinumdoman, niadtong Agosto 16, ang Customs Cebu naka-intercept og 1,092 ka master cases sa sigarilyong “Astro” sa samang consignee nga kantidad og ₱ 54.6 milyones.
Subay niini, gipasidan-an ni Mendoza ang mga importador nga  molapas ug di manumbaling sa balaod sa customs, nga gawas sa pagsakmit sa kargamento, ila usab i-revoke ang accreditation niini ug paylan og tukmang sumbong. (Jhon Tadlip/JTY)
(Source: Bureau of Customs – Port of Cebu)