Cebu City – Mahimo lang makabiyahe ang mga traysikol sa highway kon sabakon sa ordinansa sa local nga gobyerno sa lainlaing bahin sa probinsiya sa Sugbo.
Mao kini giklaro ni Jhoaden Lucero, direktor sa Department of the Interior and Local Government o DILG Cebu atol sa uwahing regular session sa hunta probinsyal.
Ubos sa DILG Circular 2020-036, gidid-an sa pag-operate ang tricycle, pedicab o motorized pedicab sa nasodnong kadalanan alang sa kaluwasan sa mga drayber pasahero.
Sa nasayran, daghan nang aksidente nga naglambigit sa mga traysikol nga hinay ang dagan subay sa highway.
Apan nag-ingon ang circular nga mahimo rang makahatag og exception ang Sangguniang Bayan o Sangguniang Panglungsod kon walay alternatibong rota.
Matod ni Lucero, ang maong exception kinahanglang suportado sa ordinansa.
Kon buot sa kalungsoran ug mga siyudad nga paagion ang mga pedicab sa highway kinahanglang magpanday na kinig traffic route plan sa di pa mapupos ang duha ka tuig nga validity sa exception.
Samtang ang LTO 7 mipasalig nga dili sila manakop sa mga tricycles, pedicab o motorized pedicab kon  adunay ordinansa nga gibasehan sa ilang gibuhat. (Jhon Tadlip/ JTY, photo Courtesy of Lode Poupert)
(Source: DILG VII)