Mga Programa Sa Munato Festival 2019 Han-Ay Na, Dula Sa Mpbl Maoy Imbukadang Aktibidad

Mga Programa Sa Munato Festival 2019 Han-Ay Na, Dula Sa Mpbl Maoy Imbukadang Aktibidad

by RPN
0 comment 14 views

Han-ay na ang mga aktibidad alang sa ika-baynte syete (27) nga foundation anniversary ug ika-dise syete (17) nga MunaTo Festival sa probinsya sa Sarangani. Mahitabo karon ng Nobyembre 27 hangtud Nobyembre 30.

Segun ni Ms. April Marjorie “Langlang” Purisima, ang tourism officer ilalum sa opisina ni Governor Steve Chiongbian Solon nga STIPC (stip-see) o Sarangani Tourism and Investment Promotion Center, daghan ang mga event nga ilang giandam walay laing katuyuan kundili ang pagpasalamat sa Kahitas-an ug sa mga katawhan kauban ang nagkadaiya apan nagkahiusa nga mga kultura.

“MunaTo” gikan sa pinulungang Blaan nagpasabot nga “first people.” Unang mga tao nga naningkamot ma-separar ang Sarangani sa South Cotabato. Unang mga tao usab sa kasaysayan sa Southeast Asia kung diin nadiskubre tuig 1991 sa usa ka kweba sa Barangay Pinol, Maitum ang mga anthropomorphic burial jars naila sa tawag nga Maitum Jars nga gituuhan nga nahulma kini panahon pa sa Metal Age gikan 5 B.C. o before Christ nagdala sa kasaysayan sa sinugdanan sa sibilisasyon sa tao dili lang sa Mindanao kundili sa Pilipinas mismo.

Imbukada pa lang sa selebrasyon sa MunaTo Festival 2019, bitbiton na ni Senador Manny Pacquiao ang mga banggiitang basketball player sa MPBL kon Maharlika Pilipinas Basketball League aron mudula sulod sa gymnasium sa Sarangani Capitol. Duha (2) ka game sa MPBL ang makita sa Kapitolyo sa Sarangani mahitabo kana sa Nobyembre 27.

Busy na karon sa pag-renovate sa Capitol Gym tungod kay target nila Governor Solon nga mahimo kini nga usa ka convention center. Segun ni Engr. Gerald Faciol, ang assistant provincial administrator for operation, gipondohan matud pa ni Governor Solon ang padayon nga pag-instolar karon sa wood tiles sulod sa Capitol Gym nga laumang matapos sa Nobyembre 20. Lauman nga muabot napud sunod semana ang bag-ong basketball ring ug electronic scoreboard.

Samtang, ang gikahinaman nga Motorcross ang subling masaksihan sa mga dumuduong sulod sa compound sa Kapitolyo, aduna pay BMX Bike Street and Skate Boarding Competition ilalum sa extreme sports competition matigayon sa Nobyembre 30. Anaa usab ang gikahinaman nga Pearl of Sarangani beauty pageant nga salmutan sa mga piniling kandidata sa pito (7) ka munisipyo sa Sarangani sa Nobyembre 29.

Sa pinaka-unang higayon, adunay mahitabo nga Mindanao-wide Tunog Katutubo, Tunog Mindanao Songwriting and Battle of the Band Competition nga apilan sa nagkadaiyang banda sa isla sa Mindanao pagpasundayag sa ilang original song composition.

Pinaagi ni Congressman Ruel Pacquiao, muhatag pud og kalingawan ang sikat nga bandang Slapshock atol sa culmination night sa Nobyembre 30. Slapshock ang inilang banda sa Pilipinas isip metal band nga nisikat sa mga kabatan-unan gikan pa dekada 90. Sa adlawan, magkatigum ang tanang religious group sa Sarangani ug Gensan aron subling ihalad sa Ginoo ang padayong kalinaw ug kalambuan sa Sarangani Province pinaagi sa tinuig nga pagpahigayon og Jesus Reigns.

Ang anniversary program ang mahitabo sa Nobyembre 28, ang adlaw sa paghinumdom sa kamugnaan sa Sarangani Province. Lauman ang pagdagsa sa mga tao gikan sa mga munisipyo tungod kay adlaw usab kini sa mga empleyado entiro Sarangani, Employees Day. Makita usab sa Municipal Village ang mga kubo sa matag munisipyo magpakita sa ilang mga produkto ug sa ilang mga tourist destination. Kini ang suportado usab ni Vice Governor Elmer De Peralta ug sa tanang board member hilabi na ni Board Member Dr. Ruiz, ang chairman sa SP Committee on Tourism, ug ni Maam Michelle Lopez Solon sa Sarangani Provincial Tourism Council.

0 comment

Related Posts