Gikalipay sa Sulong Kapayapaan program ni Governor Steve Chiongbian Solon ang pagbisita sa Sarangani Province sa mga lideres sa unom (6) ka MILF camp naka-basi sa BARMM o Bangsamoro Autonomous Region in Muslim Mindanao.
Ilang giila ang Sarangani nga modelo sa good governance ug inclusivity, adunay maayong pagdumala ug walay diskriminasyon sa tribu ug relihiyon. Adunay dakong pagmahal matud pa ang Gobernador sa Moro community bisan dili kini Muslim maong personal silang niduaw aron makakutlo og mga pagtulun-an kabahin sa maayong panerbisyo.
Kini nga unom (6) kabuok dagkong kampo sa teritoryo sa BARMM ang maoy giila sa Gobyerno sa Pilipinas nga “government-acknowledged MILF camps,” gilangkuban sa Camp Bushrah naka-basi sa Lanao del Sur, Camp Bilal naka-basi sa Lanao del Norte, Camp Rajamuda naka-basi sa North Cotabato, Camp Abubabakar sa Maguindanao, Camp Omar sa Maguindanao gihapon, ug Camp Bad’r sa Maguindanao.
Ang mga nibisita sa Sarangani Province mao mismo ang mga MILF base and brigade commander, ilang mga administrative ug political committee officer, mga myembro sa Bangsamoro Islamic Women’s Auxiliary Brigade (BIWAB) ug uban pang personahe gikan sa maong unom (6) ka MILF camp.
Duha (2) ka batch sa BARMM MILF commanders ang nibisita sa Sarangani. Nahimong venue sa mga presentasyon ang ilado na nga Princess del Leonor Hotel Resort and Convention Center sa Kayupo, Kiamba, Sarangani Province. Napulo (10) ka personalidad sa matag kampo ang gipadala, maong niabot sila og sobra saysenta (60+) katao ang niduaw sa Sarangani.
Hulyo 2018 gipirmahan ni Pangulong Duterte ang Republic Act No. 11054 nagmugna sa Bangsamoro Organic Law. Nagsugod na sa pagpangalagad ang mga opisyales sa BARMM ilalum sa ilang bag-ong gobyerno gipangunahan ni BARMM Chief Minister ug MILF Chairman Al-hajj Murad Ebrahim.