Dapat tulungan ng Comelec o Commission on Elections ang mga botante para mabatid kung sinong kandidato sa 2019 mid-term elections ang nangangampaniya na kahit wala pang campaign period.
Iyan ang hamon ng BMP o Bukluran ng Mangagawang Pilipino sa Comelec kasunod ng naging pag-amin nito na tali ang kanilang kamay para papanagutin ang mga kandidato na pumapasok sa premature campaigning.
Magugunitang sinabi ni Comelec Spokesman Dir. James Jimenez sa kaniyang Twitter account na wala silang magagawa patungkol sa pre-mature campaigning at sa halip ay hinikayat nito ang mga botante na huwag na iboto ang mga kandidatong maagang nangangampaniya.
Ayon sa grupo, bagama’t sang-ayon sila sa posisyon ni Jimenez, subalit tungkulin nito na ipaalam sa publiko kung sinu-sinong kandidato ang lumalabag sa mga panuntunan sa halalan.
Batid naman ng grupo na walang umiiral na batas laban sa premature campaigning, ngunit hindi rin ito dapat maging palusot ng Comelec para hindi nila gampanan ang kanilang tungkulin sa bayan.
Ultimately, the only real non-legislative solution to #prematurecampaigning is to not vote for those who indulge in it. That is the choice every voter must make for herself. The question is: kaya ba? #VoterEd #NLE2019
— James Jimenez (@jabjimenez) November 29, 2018
Bakit daw di “sampolan” ang mga #prematurecampaigning candidates? “Just asking” daw. Bakit kailangan pa sampolan ang nagpepresinta na maging kinatawan ng bayan? di ba dapat silang maasahan na sumunod ng kusa sa mga alituntunin ng mga batas? Just asking.
— James Jimenez (@jabjimenez) November 30, 2018