Cebu City – Gikatahong mikatap karon ang hubo nga mga hulagway ug sex video sa mga tinun-an aron ipamaligya sa tuyo nga adunay magamit sa pagbayad sa online classes.
Kini ang gitug-an sa kapolisan sa Rehiyon 7 hinungdang ila kining hugtan pagmonitor ilabi na sa dakbayan sa Sugbo.
Sa nasayran, ang Sugbo ang usa sa mga dapit sa nasod nga daghan og kaso sa cyber pornography basi sa kadaghan na sa mga nasikop sa operations.
Nahinabi sa media, si Lt. Col. Artemio Ricabo, deputy chief sa Regional Anti-Cyber Crime Unit o RACU 7 miingon nga gipaubos na nila sa monitoring ang Central Visayas.
Sa sayo pa, gikareport sa kaulohan ang mahitungod sa mga tinun-an nga namaligya sa ilang hubo nga mga hulagway ug sex video sa mga langyaw nga hangol sa unod para adunay magamit sa online classes.
Sumala pa ni Ricabo, nasubo sila sa maong kasayoan diin ang mga tinun-an mihimo nag illegal taliwa sa hulga sa coronavirus disease aron makakuwarta.
Sa nasayran, gumikan sa Covid-19, gidili na sa kagamhanan ang face-to-face nga klase samtang wala pay mamugna nga bakuna batok sa virus.
Tungod niini, ipaagi na lang sa internet ang mga leksiyon ilabi na sa pribadong mga tunghaan.
I via Jhon Tadlip/JTY
(Source: Regional Anti-Cybercrime Unit-7( RACU-7))