Cebu City – 85 porsyento nang andam ang Department of Education o DepEd 7 sa pagbukas sa klase karong Agosto 24.
Mao kini gibutyag ni Director Salustiano Jimenez sa mga sakop sa media basi sa mga report nga iyang nadawat sa mga division offices sa rehiyon.
Una niini, gipadayag ni Kalihim Leonor Briones nga idayon ang pag-abli sa klase karong Agosto 24 kay sa Southeast Asia, ang Pilipinas ug Cambodia na lay wa pa makasugod ang klase.
Ubos sa balaod, ang maong petsa ang kataposang adlaw sa pagbukas sa klase.
Sa pikas bahin, gidasig ni Jimenez ang mga ginikanan ug tinun-an nga mag-uniporme gihapon bisag online ang pamaagi sa klase.
Gitug-an ni Jimenez nga andam na ang 19 ka division sa DepEd 7 sa pag-abli sa klase luyo sa nagpadayong hulga sa Covid-19.
Midugang si Jimenez nga ilang mahimo ang pagbukas sa klase sa Agosto 24 basi sa report sa mga superintendent ug assistant superintendent atol sa miting sa regional ManCom o Management Committee niadtong Huwebes.
Gipahibawo pod sa direktor nga sa Agosto 20 ug 21 sila manghatag sa mga modules ngadto sa mga purok leaders aron mao nay motunol sa mga tinun-an o sa ginikanan sa mga tinun-an.
Gipasalig usab ni Jimenez nga ilang i-disinfect daan ang mga modules sa di pa iapod-apod sa mga tinun-an. l via Jhon Tadlip/ JTY
(Source: DepEd VII)