Cebu City – Gipaubos sa swab test ang mga drayber sa tricycle ug sa PUV o public utility vehicle sa dakbayan sa Lapu-Lapu gahapon sa buntag sud sa Hoops Dome sa Brgy. Gun-ob.
Suma pa sa pangu sa City Epidemiological & Surveillance Unit, Grace Carungay, gipahigayon ang testing sa tinguha nga mahibalik ang pagsalig sa mga pasahero sa mga drayber.
Matod pa ni Carungay, ila kining gihimo alang sa komportable nga pagpanakay sa mga pasahero.
Target sa siyudad ang pag-swab test nga libre sa lima ka libo ka drayber sa traysikol ug multicab.
Gawas niini, laing 100 ka driver sa modernong dyip gikan sa UDOTCO o United Drivers & Operators Transport Cooperative ang gitakdang i-test.
Gitataw ni Carungay nga ang swab testing sa mga drayber sa Lapu-Lapu molanat hangtod sa Oktubre 6.
Si Ernesto Crujido, usa ka 41 anyos nga drayber sa traysikol, miingon nga iyang gisuportahan ang inisyatiba aron pagseguro sa ilang kaluwasan ug sa mga sumasakay.
Human sa test, gitambagan ang mga drayber nga mag-isolate sa ilang kaugalingon hangtod mogawas ang resulta.
Ug samtang ubos sa isolation, si Carungay miingon nga nakiglambigit na siya sa CSWDO o City Social Welfare and Development Office alang sa pagkaon sa mga drayber.
(Jhon Tadlip/ JTY, photo courtesy of Lapu-Lapu City Public Information Office)
(Source: Lapu-Lapu City Epidemiological & Surveillance Unit)