Kinasing-kasing nga mihimo sa iyang pagbisita si Ginang Hershelyn Orong, 24 anyos, dala ang iyang anak nga si Ronmar Dave Orong, upat ka bulan ang panuigon, taga Barangay Sta. Isabel, ning siyudad ngadto kang City Mayor Darel Dexter T. Uy didto sa buhatan niini Oktubre 24, ning tuiga.
Ang maong pagbisita gihimo ni Hershelyn aron sa pagpa-abot sa iyang pasalamat ngadto sa Mayor human kini mitabang kanila, samtang sila nagpatambal sa iyang anak nga si Baby Ronmar didto sa siyudad sa Sugbu, pinaagi sa pagpa-ilawom sa usa ka major operation.
Si Baby Ronmar naghambin sa balati-an nga “Hydrocephalus”, busa gipa-ilawom kini sa usa ka operasyon didto sa dakbayan sa Sugbu pinaagi sa tabang gikan ni 2nd District Representative Hon. Glona Labadlabad, ug samtang atua sila sa Sugbu, mipaabot usab sa iyang personal nga tabang si City Mayor Darel Dexter T. Uy, pinaagi sa pag-abaga sa mga galastohan sa ilang pagpondo didto sa maong dakbayan, partikular na sa pagkaon, puy-anan ug transportasyon, diin alang kang Hershelyn, dako usab kaayo nga tabang alang kanilang kabus, ilabi na sa panahon nga sama niini.
(Source: Dipolog City Government Facebook page)
