El govierno provincial del Basilan ya inagura mga proyectos de infrastractura que tiene el valor de P25 millon del ayer, dia de Martes.
El mga proyectos ta incluwi el segundo parte del cementada del camino na Basilan National High School, construccion del parada del “Provincial Engineers Office (PEO)”, multi-purpose hall del PEO, casa de carpenteriya del PEO, construccion del garaje para del autobus dental y ambulancia, dos andanas “multi-function center” del oficina de salud del provincial y un trak de agua.
Con el inaguracion del mga proyectos ya encabesa si Governador Hadjiman Hataman-Salliman y Vice Governador Yusop Alano del Basilan.
Asegun con Salliman, el sen que ya usa para na construccion del mga nuevo completao proyectos ya saca na 20 porciento del fundos de desrollo del govierno provincial.
Na su mensaje, si Alano ya habla cay el cosa ta sirvi como un sueño, ya queda ya ahora un realidad y acomplisimiento.
Mientras tanto, asegun con Doctora Sharifa Abbas-Alvarez, el oficial de salud del provincia, ya habla cay el inaguracion del dos andanas multi-function center ta representa un progreso.
(B. Garcia, photo courtesy of Basilan Provincial Information Office)