Dos personas ilegalmente ta transporta crudo y gasolina ya aresta mga autoridad na costa weste de este ciudad, el policia local ya reporta del Miercoles.
Asegun con el policia local con el mga arestao personas ya conose como si Albert Dumaboc, 29 años el edad y un chufer, y su ayudante, si Sionic Galindo, 31 años, ambos mga residentes del Sitio Malandi, Barangay Patalon, en este ciudad.
Asegun con el policia, con Dumaboc y Galindo ya aresta mga personajes del Zamboanga City Police Station 10 (ZCPS10) mga alas 10:45 del Martes denoche na carritera del Barangay Sinubong, en este ciudad.
Base na investigacion, mga personajes del ZCPS10 ya conduci “checkpoint” cuando ya ase sila para con el trak que ta maneja si Dumaboc para inspecciona.
Durante el inspeccion, ya descubri mga pulis cay el trak ta contene 11 galon de crudo y dos galon de gasolina que tiene el valor de P22,000.
Asegun con el policia, ya aresta con Dumaboc y Galindo y ya confisca con el crudo y gasolina despues que ya falla sila presenta mga pertinente documentos del de ila carga.
Si Dumaboc y Galindo incluido el mga crudo y gasoline hasta el trak ya pone bajo el custodia del ZCPS10 y esperanso entrega na bombero para el propio disposicion.
El transportada de crudo y gasolina sin pertinente documentos es un violacion del “Republic Act 9514” o mas conosido como el “Fire Code of the Philippines of 2008”.
(B. Garcia)
