Aparesiaren ni laoag city Mayor Michael Marcos keon ti dedikasyon dagiti daycare teachers iti siyudad iti trabahoda. Daytoy ket iti laksid kadagiti madumaduma a karit a mapaspasaranda nangnangruna ita a panawen ti pandemya gubbuay ti Covid-19.
Personal a nakisarsarita ti mayor kadagiti mangisursuro bayat iti panangbisitana kadakuada iti National Child Development Center iti barangay 2 iti siyudad.
Iti agdama, umaboten ti 1, 805 dagiti naka-enrol nga ubbing kadagiti 92 a child development centers iti syudad.
Nagyaman pay ti mayor kadagiti daycare teachers ti an anusda a mangisursuro kadagiti ub-ubbing ken agserserbida a maikadua a nagannak.
Kiniddaw pay ti mayor kadagiti nagannak ken guardians iti panangiyenrolda kadagiti ubbing nga agtawen ti tallo agingana iti uppat kadagiti child development centers iti barangayda.
Masapul kunana a maipaayan ti nasapa nga edukasyon dagiti ubbing para iti napinpintas a masakbayanda. (OIC Rod G. Sadian, RPN DZRL Batac)
(Source: LGU – Laoag City)