Cebu City- Gitambagan ni Cebu City Mayor Edgardo Labella nga magkalma lang taliwa sa desisyon sa IATF o Inter-Agency Task Force for the Management of Emerging Infectious Diseases pagkanselar sa validity sa quarantine passes sa miaging gabii.
Sumala pa ni Labella, napugos ang IATF paghimo sa mas bug-at nga restriction tungod kay nasuta sa pasiunang pagsiksik nga ang mga mulupyo padayong milapas sa mga sumbanan ubos sa ECQ o enhanced community quarantine.
Matod pa ni Labella, gimandoan sila sa DILG pagkanselar sa tanang passes nga giisyo sa mga mulupyo.
Midugang ang mayor nga gihimo kining maong drastic measure dihang nakita sa team sa IATF nga milibot sa siyudad ang daghang tawo nga nanggawas sa ilang balay.
Gipasabot ni Labella nga ilang gihimo ang transition isip kabahin sa pagpugong sa pagkatap sa COVID-19.
Hinuon, gipasalig ni Labella nga aduna ra unyay bag-ong passes nga iapod-apod ug dugang detalye ang luwatan sa mosunod nga mga adlaw.
Iya usab gipasalig nga ang local nga gobyerno makig-alayon sa IATF para pagseguro nga matubag ang batakang panginahanglan sa mga tawo nga apektado sa lockdown.
Sa kataposan, iyang giawhag ang publiko nga likayan ang pag-post ug pag-share og walay klarong impormasyon nga makapatarantar sa mga tawo.