Gitudlo karon isip usa sa mga “Disiplina Muna Ambassadors” si City Mayor Darel Dexter T. Uy, sa Department of the Interior and Local Government (DILG) ug Department of Health (DOH).
Kini ang nasayran human gikompirmar sa naasoyg’ng duha ka mga nasudnong ahensiya sa unahan atol sa gipahigayon Virtual Launching sa “BIDA ANG MAY DISIPLINA: Solusyon sa COVID – 19 Program kaniadtong nakalabay nga Septembre 2, sa may ala 1:00 ang takna sa kahaponon pinaagi sa Online, didto sa buhatan sa Mayor ning dakbayan.
Atol sa maong programa, mipabati sa iyang welcome speech si DILG Undersecretary Jonathan Malaya, nga gisundan usab sa mensahe ni DOH Undersecretary, Dr. Maria Rosario Vergeire.
Tipik sa maong programa mao ang pagpabati sa ilang mga mensahe ang natudlong mga Disiplina Muna Ambassadors alang sa pagsuporta sa naasoy’ng programa, mipabati sila si Baguio City Mayor Benjie Magalong ug City Mayor Darel Dexter T. Uy.
Sumala pa ni Mayor Uy sa iyang mensahe, nga siya nagpasalamat ngado sa DILG gumikan sa pagsalig niini ngadto kaniya, uban sa pagkatudlo niya isip Disiplina Muna Ambassador.
Dugang pa niini, mapasigarbohon kini alang sa iyang kaugalingon nga nahilakip sa mga inilang Mayor sama nila ni Mayors, Sarah Duterte sa Davao, Isko Moreno sa Manila, Benjie Magalong sa Baguio ug Richard Gomez sa Ormoc, diin gumikan niini, siya nagatuo nga bisan ang mga gagmay’ng dakbayan sama sa atong dakbayan ang makahatag gihapon ug tampo.
Dugang pang gi-asoy sa batan-ong mayor, nga ang disiplina maoy nahimong tipik sa kinabuhi sa usa ka matuod nga Dipolognon, diin matud pa niya nga kini ang nahatagan ug pruweba atol sa atong pagsinati ning pandemya, diin ang katawhang Dipolognon ang dili malisod nga mosunod ngadto sa mga quarantine protocols.
Dugang pa sa mayor, nga siya nagpasalamt ngadto sa kahitas-an, diin maoy naghatag ug bendisyon aron kapanalipdan ang atong dakbayan batok sa COVID 19, diin mapasigarbohon usab niyang gibutyag, nga ning kasamtangan, zero case na ang atong dakbayan sa COVID 19.
Lakip sa gisaysay sa mayor, nga sa nanglabay nga mga katuigan, ang dakbayan sa Dipolog ang nagpatuman na sa mga nagkalain-laing programa sama sa Ordinansa 123, diin kini ang nahimong malamposon sulod na sa 22 katuig sukad kini gipatuman, gumikan sa disiplina nga gibatonan sa mga katawhang Dipolognon.
Isip panapos sa iyang mensahe, matud pa sa mayor, nga siya nagatuo nga pinaagi sa kinasing-kasing nga pagpatuman sa mga balaod, kini ang mobunga ug disiplina, dinuyogan sa suporta gikan sa mga katawhan ug sa komunidad.
Lakip sa gitudlo nga mga Disiplina Muna Ambassadors kauban ni Mayor Darel Uy mao sila si Davao City Mayor Sarah Duterte, Baguio City Mayor Benjie Magalong, Manila City Mayor Isko Moreno ug Ormoc City Mayor Richard Gomez. (City Information Office-alb)