Davao de Oro – Gipabuhatan og balay nga libre nilang kapuy-an ang lima ka pamilya sa Brgy. Cabuyoan, Mabini ilalom sa “Pakiglambigit: Community Build Outreach Project” sa Davao de Oro nga giimplementar bag-o lang ni Gov. Jayvee Tyron Uy gamit ang iyang personal funds ug mga pundo sa probinsya, sa MLGU Mabini, sa 71st Infantry “Kaibigan” Battalion, Religious Sectors, ug uban pang mga partners.
Ang pagtukod sa lima ka mga balay gisugdan sa milabayng Domingo (Nobyembre 22,2020) pinaagi sa Volunteers Kick-off nga gipanguluhan nila ni Mayor Reynaldo Dayanghirang sa Mabini, Major Malano sa 71st IB, ug ni BM Nicky Opisan nga maoy mihatag sa Inspiring Message ni Gov. Tyron Uy.
Miapil sa Bayanihan House Build ang mga Staff sa Provincial Governor’s Office, sa Provincial Social Welfare and Development Office (PSWDO), sa Provincial Engineers’ Office, sa MLGU Mabini, ang mga sakop ni Cabuyoan Brgy. Capt. Romeo Aban, ang Youth for Peace Movement ug uban pa.
Apil sa mga Conflict Affected Areas sa Davao de Oro ang Brgy. Cabuyoan nga naulahi sa development, ug sa delivery sa gikinahanglang social services tungod sa hulga sa seguridad. Apan sa pagkakaron stable na matud ni Gov. Tyron Uy ang peace and order situation sa lugar tungod sa hiniusang mga paningkamot nga gihimo sa probinsya, sa MLGU Mabini, ug sa nagkadaiyang mga ahensya sa gobyerno.
“Ang maong komunidad sa Cabuyoan usa sa mga identified conflict-affected communities sa atong probinsya. Sa dugay nga panahon nadamay sila sa armadong kagubot nga nagtanggong sa development sa maong area apil sad ang delivery sa gikinahanglanglang social services. Apan karon pinaagi sa atong gipakusgang mga paningkamot sa lain-laing mga ahensya sa gobyerno nahimo nang stable ang lugar. As our contribution, we pledge to build 5 houses, two of which ginahimo sa atong mga staff sa Governors’ Office.” Matud ni Gov. Tyron Uy.
(Gilbert M. Cabahug, PAO-ID Davao de Oro)