Cebu City – Gitakdang hatagan sa ilang tag-3 mil pesos nga ‘semestral pension’ ang dul-an sa 280,000 ka senior citizens sa Central Visayas, nga mga social pensioners sa Department of Social Welfare and Development o DSWD-7, karong sunod buwan.
Si Fharlyn Logroño, project development officer 2 sa DSWD-7, miingon nga target nila nga mahuman sa Mayo ang pag-apod-apods a tag-₱ 3,000 nga semestral pension nga maoy hatagan sa ahensiya sa unom ka buwan gikan sa Enero ngadto sa Hunyo sa tag-₱ 500 matag buwan.
Suma pa sa DSWD-7, ang Central Visayas adunay 279,037 ka social pensioners, nga gilangkoban sa 117,330 sa Cebu Province; 96,394 sa Bohol; 54,760 sa Negros Oriental; ug 10,553 sa Siquijor.
Gipasabot ni Logroño nga kadtong nagluya, masakiton ug adunay kabilinggan sa lawas ug nagkalisod-lisod sa pagpuyo ang ilang target.
Lakip sa mga LGUs o local government units nga nakasugod na sa distribution mao ang Toledo City, Bantayan, Madredijos, Sta. Fe, ug Alegria, Cebu; Catigbian, Dauis, Getafe, Anda, Guindulman, ug Valencia, Bohol; ug Tanjay, Negros Oriental.
Tungod sa pandemya, si Logroño miingon nga ilang gibahin-bahin ang oras sa distribution sa matag sityo sa barangay aron kalikayan ang pagpunsisok, samtang magtamod sa minimum health protocols, sama sa pagsul-ob og face mask ug face shield ug social distancing.
Kadtong mga edaran nga nag-edadog 65 pataas gidasig sa ahensiya nga magpada lang og representante nga mokobra sa social pensions subay sa guidelines sa IATF o Inter-Agency Task Force. (Jhon Tadlip/JTY)
(Source: DSWD 7, photos courtesy by Benny Albaño | Lapu-Lapu Public Information Office | Barangay Pusok)