Cebu City – Pormal nga gilusad sa Department of Health o DOH 7, OPAV o Office of the Presidential Assistant for the Visayas, ug sa Project Balik Buhay ang libreng swab test sa mga returning overseas Filipinos (ROFs) ug overseas Filipino workers (OFWs)sa arrival area sa tugpahanan sa Mactan.
Si Dr. Mary Jean Loreche, chief pathologist ug tigpamaba sa DOHÂ 7, miingon nga ang free swabbing ug reverse transcription-polymerase chain reaction o RT-PCR test sa tanang gipapauli nga mga OFWs ug mga Pinoy nga nagpuyo sa gawas nga mangabot sa MCIA nagsugod niadtong Marso 31.
Suma pa ni Loreche, ang maong lakang nakahatag og dugang kahasol sa OWWA o Overseas Workers Welfare Association ug dugang gasto sa pagpapuyo sa hotel sa naasoyng mga tawo.
Sa iyang bahin, si Presidential Asst. for the Visayas Michael Dino miingon nga ang maong lakang agig sanong sa direktiba ni Pres. Rodrigo Roa Duterte sa paghimong paspas sa testing ug pagpagawas sa resulta sa mga OFWs ug returning residents.
Suma pa niya, tinguha sa presidente nga makapauli gilayon ang mga OFWs ug returning residents sa ilang bay inay mogugol una og taas nga panahon sa mga quarantine facilities.
Nanghinaot si Dino nga ang maong inisyatiba makatabang sa pagpaubos sa mga kaso sa Covid-19 sa Sugbo ug sa rehiyon. (Jhon Tadlip/JTY)
(Source: DOH 7 | OPAV, photo courtesy of MCIA)