Pormal nang gisalindot sa kagamhanang probinsiyal sa Sugbo ang real-time polymerase chain reaction o RT-PCR test isip requirements sa pagsud sa mga domestic tourist.
Kini ang unod sa Executive Order no. 12 nga gipirmahan ug giluwatan ni Gob. Gwendolyn Garcia gahapon.
Base sa maong EO, gilugakan na ang travel restrictions sa mga dumuduong sa lalawigan nga nalambigit sa kalihokang pang-turismo.
Segun pa sa porsiyon sa EO no. 12, tinguha sa probinsiya nga moburot pagbalik ang ekonomiya nga apektado sa pandemya busa mas maayong lugakan ang travel restrictions sa mga tawong buot manuroy sa Sugbo subay sa gilatid nga sumbanan sa national IATF o Inter-Agency Task Force.
Ang EO, nga mo epekto dihadiha, naghimo usab nga pormal sa plano ni Garcia sa hingpit nga pagbukas sa lalawigan sa mga turista pinaagi sa pagwagtang sa ubang protocols, lakip sa negatibong resulta sa RT-PCR test.
Hinuon, gimandoan sa Kapitolyo ang mga dumuduong pagpresentar og balidong medical certificate nga nakuha pito ka adlaw sa dili pa ang ilang pag-abot, pre-booking sa resort o hotel, ug makapasar sa symptoms checking o screening points sa departure ug arrival points.
(Jhon Tadlip/JTY)
(News & photo courtesy of Cebu Provincial Government)
